الجمعة، 29 يناير 2016

حدوتة الشيطان الرفيع والشيطان التخين

.الشيطان الرفيع والشيطان التخين . كان يا ما كان يا سعد يا إكرام ولا يحلي الكلام إلا بذكر النبي عليه الصلاة والسلام كان في مرة شيطانين واحد تخين قوى قوى وواحد رفيع خالص مالصشيطان تخين وشيطان رفيع كانوا أصحاب وعلي طول بيتجمعوا مع بعض عند الشيطان الكبير بتاعهم عشان يشوف مين أكتر واحد شرير فيهم وبيعمل الشر وبكده الشيطان الكبير بتاعهم بيديهم جوائز وبيخليهم كمان يدربوا الشياطين الصغننين وفي يوم وهما مجتمعين بعد وقت كبير قوى وما شفوش بعض بقي واحد فيهم تخين وواحد رفيع
سألوا بعض ايه اللى عمل فيهم كده ايه اللى خلي التخين بقي تخين قوى والرفيع بقي رفيع قوى فالتخين قال أنا قاعد عند ناس كل اما يجوا يأكلوا أو يشربوا مش بيقولوا بسم الله الرحمن الرحيم فأنا أقعد معاهم وأكل أكل كتير لحد اما اشبع وكل اما يجوا يمسكوا حاجة أو يلبسوا حاجة مش بيقولوا بسم الله الرحمن الرحيم فأنا البسها معاهم واستعملها معاهم وكل اما يجوا يناموا مش بيقولوا بسم الله الرحمن الرحيم فأنا أنام قبلهم في سريرهم واستريح وعشان كده كل شويه اتخن أتخن لحد أما بقيت كده وربنا زعل منهم والملائكه مشيت من البيت وانا اللى بقيت لواحدى معاهم

أما الشيطان الرفيع قال أنا بقي قاعد مع ناس كل أما يجوا يأكلوا أو يشربوا يقولوا بسم الله الرحمن الرحيم
فأنا أبعد بعيد عن الأكل ومش أكل ولا أشرب وكل اما يجوا يمسكوا حاجة أو يلبسوا حاجة يقولوا بسم الله الرحمن الرحيم فأنا مش امسكها ولا ألبسها وكمان كل أما يجوا يناموا في سرايرهم يقولوا بسم الله الرحمن الرحيم فأنا ما أقربش من السرير وأفضل واقف مش أنام وعشان كده أنا بقيت رفيع كده وكمان ربنا بيحبهم قوى والملائكة علي طول قاعدة معاهم في البيت يدعوا لهم وعشان كده يا حبيبي يا حلوين اما نيجى نأكل أو نشرب او نعمل اي حاجة نقول بسم الله فربنا يحبنا والشياطين يبعدوا عنا وكمان يوم القيامة اما ربنا يجي يحاسبنا ويدينا كتابنا اللى مكتوب فيه الذنوب اللى احنا عملناها فنيجي نمسكه نقول بسم الله الرحمن الرحيم فربنا يقول لنا خلاص انا رحمان رحيم وانت دعيتنى بكده عشان كده انا غفرت لك وندخل الجنة يا حبيبي من غير ما نتحاسب
وتوته توته خلصت الحدوته حلوه ولا..........

ليست هناك تعليقات:

إرسال تعليق