دى حكايه تنفع كمان للاطفال اللى بيحطوا صوابعه فى فمهم علشان كان فى مامى طالبه حكايه عن الموضوع دا يارب تنفع
حكاية هنا مع الجراثيم
كان يامكان فى بنوته اسمها هنا ..اسمها جميل ,,,وهى كمان بنوته جميله بس ياخساره ,,,هنا كان عندها عادتين وحشين خالص .. عارفين ايه ؟
أول عاده انها مش بتغسل ايدها قبل الاكل , والعاده التانيه بتاكل ضوافرها بأسنانها ودى حاجه سيئه جدا .
ماما كانت تقول لهنا : ياهنا ماينفعش ناكل من غير غسيل الايد بالمايه والصابون علشان الجراثيم والميكروبات
, ماما تقول : ياهنا ماينفعش ناكل ضوافرنا بأسنانا تحت الضوافر فيه اتربه , تحت الضوافر فيه جراثيم وميكروبات .
كانت ماما دايما تنصحها وتقول : لما نرجع البيت من اى مكان نغسل ايدنا بالمايه والصابون علشان الجراثيم والميكروبات .
لكن هنا كانت تيجى تاكل تفتكر كلام ماما فتبص لايدها وتقول : أنا مش شايفه جراثيم ولا ميكروبات فى ايدى اكيد لو موجوده هشوفها مافيش داعى أغسل ايدى , وتاكل وماتغسلش ايدها .
تيجى تاكل ضوافرها بأسنانها تفتكر كلام ماما ان فيه جراثيم تحت الضوافر فتبص لضوافرها وتقول : أنا مش شايفه جراثيم ولا ميكروبات تحت ضوافرى أكيد لو موجوده هشوفها وتاكل ضوافرها بأسنانها .
بس كان فيه حد بيسمعها وهى بتتكلم ومركز فى الكلام عارفين مين ؟
الجراثيم والميكروبات كانوا مش بس سمعينها دول كانوا بيضحكوا كل لما تقول كدا ويقولوا :
هنا فاكره أنها هتقدر تشوفنا بعينها هاهاهاهاا لكن طبعا مش هتقدر علشان احنا صغيرين جدا جدا جدا ماحدش يقدر يشوفنا بعينه خالص .
كانت الجراثيم مبسوطه ان هنا مش بتغسل ايدها بالمايه والصابون , وكانت الجراثيم مبسوطه أنها بتاكل ضوافرها بأسنانها وأنهم بالشكل دا هيقدروا يدخلوا جوا بطنها ويتغذوا ويكتروا , وكانت الجراثيم بتنادى كل أصحابهم الجراثيم التانيه علشان يقعدوا فى بيت هنا وفعلا بيت هنا أصبح مليان جراثيم , وكانوا بيحبوا يتجمعوا حولين هنا علشان عارفين أنها مش هتغسل ايدها , وطبعا هنا ماكناتش بتغسل ايدها
وفى يوم الخميس بالليل بابا هنا قالها أنهم هيروحوا يوم الجمعه الصبح أن شاء الله فى رحله وهيروحوا الملاهى كمان وهيقضوا يوم جميل .
هنا كانت مبسوطه جدا , هو فى حد مايفرحش أنه هيروح الملاهى , ونامت على سريرها وفى دنيا الاحلام بتحلم بالرحله والملاهى والمراجيح .
ويوم الجمعه الصبح صحيت هنا من نومها لكن ....... كانت بتعيط وبتصرخ وبتنادى على ماما وبابا .
كانت هنا مش قادره تفتح عينها وعينها مورمه , وبتصرخ من بطنها , بطنها واجعها جدا والالم شديد ,,, ياعينى ياهنا
ماماوبابا أخدوا هنا بسرعه على المستشفى , والدكتور كشف على بطنها وعينها وعملوا تحاليل لهنا كتير .
الدكتور بلغ ماما وبابا أن هنا هتحتاج تقعد كام يوم فى المستشفى لحد ماحالتها تتحسن .
بدأت هنا فى العلاج من أول يوم وكانت بتاخد أدويه كتيره وكمان حقن هى كانت مضايقه من الدوا علشان طعمه مر , والحقن بتوجعها .
بس ماما قالت : كلنا مش بنحب الدوا والحقن بس لما بناخدهم هنخف وهنكون أحسن وحالتنا تتحسن مع كل معلقة دوا ياهنا هتخفى أكتر بأذن الله , وتخرجى من المستشفى .
هنا أخدت الدوا والتزمت بكل تعليمات الدكتور كمان فى الاكل علشان كانت بتاكل حاجات محدده .
أصحاب هنا كانوا بيتصلوا يسألوا عليها ويطمنوا على صحتها ووعدوها أنهم هيزوروها فى البيت لما تخرج من المستشفى علشان الزياره ممنوعه , طبعا دينا علمنا اننا نسأل على المريض ونزوره شاطرين أصحابك ياهنا
هنا اتحسنت كتير والدكتور بلغ ماما وبابا أن هنا تقدر تخرج من المستشفى وانها خفت خلاص .
فرحت هنا وحمدت ربنا أنه اتم شفاها .
هنا فكرت قبل ماتخرج من المستشفى تشكر الدكتور اللى كان بيعالجها جميل اننا نشكر اى حد يعملنا حاجه
, الدكتور لما شافها قال : هنا أجمل بنوته فى المستشفى الحمد لله على شفاكى , أنا عايز أسألك على حاجه مهمه أنتى عارفه أنتى تعبتى ليه ؟
هزت هنا راسها وقالت : لا مش عارفه ينفع حضرتك تقولى .
الدكتور قال : كان فيه ميكروبات وجراثيم كتير فى بطنك هى السبب ان بطنك توجعك , وكمان عينك كان فيها ميكروب هو سبب ان عينك ورمت وانتى كل الادويه اللى اخديها قضت على الميكروبات كلها .
هنا قالت : والميكروبات دى جاتلى منين ؟ ودخلت بطنى ازاى ؟ وبردوا جت فى عينى ازاى ؟
الدكتور قال : الميكروبات والجراثيم موجوده حوالينا فى كل مكان وهى مضره وبتسبب أمراض كتيره مش بس البطن والعين ممكن الجلد , الانف , الاذن , بنحمى نفسنا منها بالنسبه للاكل مانكلش من برا البيت او اى اكل مكشوف ونغسل ايدنا بالمايه والصابون أول مانرجع من برا البيت وقبل الاكل والعين مش نحط أيدنا ناحية عينا وهى مش نضيفه .انتى عملتى ايه من الحاجات دى ؟
تفكر هنا وبعدين تقول : أنا ماما دايما تقولى اغسلى ايدك بالمايه والصابون بس أنا كنت بشوف ايدى مافيهاش جراثيم فمش بغسلها وكمان باكل ضوافرى بأسنانى , وبحط ايدى على عينى من غير مااغسلها مش لو فيه جراثيم هشوفها ؟
قالها الدكتور : تعالى ياهنا هوريكى حاجه شايفه الجهاز دا ؟
هزت هنا راسهاة: وقالت اه.
قال الدكتور : دا اسمه ميكروسكوب بيكبر الحاجات الصغيره جدا جدا ونقدر نشوفها بعنينا . بصى فى الميكروسكوب ياهنا
شافت هنا فى الميكروسكوب حاجات صغيره بتتحرك ولما شالت عينها من على الميكروسكوب ماشافتش حاجه .
قال الدكتور : دى ياهنا الجراثيم هى بتكون موجوده فى ايدك بس انتى مش هتشوفيها بعينك , علشان كدا افضل حل اننا نغسل ايدنا بالمايه والصابون هتقضى على الجراثيم , علشان كدا ربنا امرنا اننا نتوضا فى اليوم قبل الصلوات علشان دايما نحافظ على نظافة جسمنا ونقضى على الجراثيم دايما .
اتفقت هنا مع الدكتور انها هتغسل ايدها ومش هتاكل ضوافيرها بأسنانها تانى , علشان تحافظ على صحتها .
رجعت هنا البيت وأصحابها زاروها , وكانت مبسوطه بزيارتهم وشكرتهم وحكيتلهم كلام الدكتور عن الجراثيم وان غسيل الايد حاجه مهمه علشان نحمى نفسنا من الامراض .
هنا دلوقت تبص فى ايدها وتقول : أنا مش شايفه جراثيم فى ايدى بس مش معنى كدا انها مش موجوده ممكن تكون موجوده وانا اكيد مش شايفاها أنا هغسل ايدى بالمايه والصابون .
.
مين بيسمعها وهى بتتكلم عارفين مين ؟
أيوا الجراثيم ..بس المره دى كانت الجراثيم بس زعلانه ان هنا بتغسل ايدها بالمايه والصابون , الجراثيم بعدت عن هنا , الجراثيم سابت بيت هنا .
كمان هنا بطلت تاكل ضوافرها بأسنانها تماما .
لاحظت هنا وماما انها اصبحت مش بتتعب كتير زى زمان وان صحتها اصبحت احسن وبتكبر يوم عن يوم , ماالجراثيم بعدت عنها خلاص .
وفى يوم الخميس بالليل بابا هنا قالها أنهم هيروحوا يوم الجمعه الصبح أن شاء الله فى رحله وهيروحوا الملاهى كمان وهيقضوا يوم جميل .
هنا كانت مبسوطه جدا , هو فى حد مايفرحش أنه هيروح الملاهى ,ونامت على سريرها وفى دنيا الاحلام بتحلم بالرحله والملاهى والمراجيح .
ويوم الجمعه الصبح صحيت هنا من نومها سعيده وفرحانه ولبست وراحت مع بابا وماما الرحله وراحت الملاهى وقضت يوم جميل .
نقول تانى كان يامكان كان فى بنوته اسمها هنا اسمها جميل وهى كمان جميله وتخلصت من العادات السيئه
