السيرة النبوية للأطفال مكتوبة الحلقة الثانية

الحلقة 2 .. في البادية
يلا يا أحلي أمهات و معلمات .. مكملين ..... حتة حتة ...
لغاية لما يحفظوا سيرة سيدنا محمد عليه الصلاة و السلام ........
....... كرري الحلقة ... قبل لم تخشي في الحلقة اللي بعدها ..
------------------------------------

الحلقة 2

يلا يا أحلي أمهات مكملين ..... حتة حتة ... لغاية لما يحفظوا سيرة سيدنا محمد عليه الصلاة و السلام ............... كرري كل حلقة ... قبل لم تخشي في الحلقة اللي بعدها ...

الحلقة 2 .........

كان يا ما كان ...و ما يحلي الكلام غير بذكر النبي عليه الصلاة و السلام
الولاد الممتازين يقولوا اييييييه ؟؟؟؟ ............ عليه الصلاة و السلام .... تماااااام !

دلوقتي سيدنا محمد لسه مولود .... و الناس زمان أول لما يتولد طفل جديد ... كانوا يودوه يعيش في مكان اسمه البادية .. البادية دي مكان واسع وجميل و نضيف ... و اللي يروح هناك جسمه بيبقي قوي و بيكبر و صحته بتبقي حلوة ....

و كانت بتيجي مرضعات ياخدوا الأطفال معاهم للبادية و يرضعوهم لبن عشان يكبروا ...
......جت مرضعات كتير ... ووقفوا يسألوا الناس : حد عنده طفل صغير ناخده معانا البادية و نرضعه لبن عشان يكبر؟؟؟
الناس يقولوا ليهم أيوة إحنا عندنا طفل أهو خدوه معاكم للبادية .... فياخدوه معاهم ..
..........................
مامة سيدنا محمد ...آمنة .... قالتلهم أيوة .. أنا عندي طفل لسه مولود !!!
فيسألوها المرضعات: فين باباه اللي هيدفعلنا فلوس ؟ .... تقولهم : باباه مات‏‎frown‎‏ رمز تعبيري
فيردوا المرضعات : لأ .... مش هناخده معانا ... ‏‎frown‎‏ رمز تعبيري
يااااااااه ... طب مامته و جده يعملوا ايه بقه ؟؟ ... جده قالهم أنا هديكم فلوس
...بس برضه مرضيوش ...... ‏‎cry‎‏ رمز تعبيري
..............................
لكن كان فيه مرضعة ..... اسمها حليمة .....حليمة السعدية ،،، و كان معاها جوزها .... و ابنهم الصغير ....
و كانوا راكبين حمار ضعيييف و بيمشي براااااااحة
و عندهم جمل ( ناقة )...بتديهم لبن .... كانوا بيحلبوها زي البقرة كده.... بس كانت بتجيب لبن شوية صغيرين خالص ....

كانت حليمة بتدور علي طفل تاخده معاها البادية و ترضعه من لبنها ...
فمكنتش لاقية ولا طفل تاخدوا معاها ... كل المرضعات التانيين خدوا كل الأطفال ...إلا سيدنا محمد
فقالت خلاص أنا هاخد الولد اللي باباه مات !!!!..... قصدها علي سيدنا محمد !
فراحت لمامته و جده ...و قالتلهم خلاص أنا هاخد محمد معايا .... قولوا : عليه الصلاة و السلام يا اولاد و يا بنات !!!!
.................................................. ...
عارفين ايه اللي حصل ؟؟
حصلت حاجة عجيبة ...
أول لما أخدت سيدنا محمد معاها ....حصلها حاجات حلوة كتير !
لقت الجمل( الناقة ) الضعيف بتاعها الي مكنش بيجيب غير حبة لبن صغيرين .... بقي بيجيب لبن كتيييييير .... و جت تركب الحمار الضعيف بتاعها عشان تروح بيه البادية .... لقيته بقي أقوي ...و بقي يعرف يمشي بسرعة ...
و المرضعات التانيين اللي معاها بقوا مستغربين !! ... و يقولوا إزاي الحمار البطيء بقي قوي جدا ...
عارفين ليه يااولاد ؟
عشان ربنا بيخلي كل حاجة حوالين سيدنا محمد تبقي أحلي مما هي عليه ،،،و يبقي فيها خير وبركة من ربنا ،،

لغاية لما وصلوا البادية ...
حليمة كانت عايشة في بيت في مكان اسمه ....ديار بني سعد ....

و كان عندها أرض ... بس السنة دي كانت أرضها ما فيهاش زرع و ماية .... بس العجيب إن أول لما وصلت .. و معاها سيدنا محمد ... الدنيا مطرت .... و الزرع الجميل بدأ يطلع .... و بقت أرضها جميلة

................................

حليمة قعدت تفكر الطفل ده أول لما جبت محمد معايا ...حصل حاجات حلوة كتير ... الطفل فيه بركة و خير من ربنا .
....بيخلي كل حاجة حواليه جميلة ......فبقت حليمة فرحانة أوي بسيدنا محمد .
................................
و كبر سيدنا محمد في البادية لغاية لما بقي عنده سنتين ..... و بقي جسمه قوي .
... و أقوي كمان من الأطفال اللي قده .....فكده خلاص كبر ولازم حليمة ترجعه لأمه .
بس حليمة كانت بتحب محمد عليه الصلاة و السلام ... و عايزاه يقعد معاها وقت أطول .
فراحت حليمة لأم سيدنا محمد ...
و قالتلها : ممكن تسيبي محمد يفضل معايا شوية كمان ؟؟؟البادية مكان جميل و جوها حلو وممكن لو رجع يتعب ...خليه معايا حبة كمان .
و فضلت تتحايل علي مامته ...( آمنة بنت وهب )
لغاية لما مامته وافقت ...
و رجع سيدنا محمد مع حليمة للبادية ....( لمكان بيتها ...ديار بني سعد )

.................................

بس هتحصل مفاجأة هنحكيها الحلقة الجاية ...
اللهم صل علي سيدنا محمد
.................................
دعواتكم بقه بظهر الغيب .........

بقلم
د. رشا رشاد

السيرة النبوية للأطفال مكتوبة الحلقة الأولي

الحلقة 1 .. مولد سيدنا محمد 
الحلقة 1

بسم الله

كان ياما كان .... و ما يحلي الكلام غير بذكر النبي عليه الصلاة و السلام ...
الولاد الحلوين يقولوا إيه ؟ ‏‎smile‎‏ رمز تعبيري
............ عليه الصلاة و السلام .... ممتازين !

مين يا أولاد أحسن واحد في الدنيا ؟ .... سيدنا محمد
سيدنا محمد ... هو اللي ربنا اختاره عشان يعلمنا الصح و الغلط ....و الحلال و الحرام .
ربنا اختار سيدنا محمد عشان يعلمنا الأعمال الطيبة و الأخلاق الجميلة .
و يعلمنا دينا الإسلام ....

واللي هيحب سيدنا محمد و يسمع الكلام اللي ربنا علمه لسيدنا محمد ... ربنا هيحبه
.... و هيدخله الجنة .
و الجنة دي أحلي مكان ...
اللي فيه كل حاجة و أي حاجة احنا عاوزينها ... ومهما فكرنا في الجنة.... الجنة برضه هتبقي أحلي من تفكيرنا !!!!

كان زمان زماااان ........ سيدنا ابراهيم بيبني الكعبة و معاه ابنه اسماعيل .... سيدنا إبراهيم و هو بيبني الكعبة ..... و قف يدعي ربنا ... إنه يبعت للناس ....واحد ... رسول ....يعلمهم الصح و الغلط و الحلال و الحرام ...... عشان يخليهم ناس كويسين و طيبين و بيعملوا الخير ..... فربنا أستجاب الدعاء ...و اختار سيدنا محمد ....إنه يكون المعلم ... .... اللي يعلم كل الناس أوامر ربنا .

أبو سيدنا محمد ......كان اسمه ايه ؟ ........... عبد الله ابن عبد المطلب ( لازم الطفل يردد )
و مامته كان اسمها ايه ................. آمنة بنت وهب .......(خليه يقول وراكي )

سيدنا محمد لما كان لسه جوة بطن مامته ..... باباه عبد الله مات ...... و مكنش شافه لأنه مكنش لسه أتولد ........... عارفين سيدنا محمد أتولد إمتي؟؟ .... أتولد عام الفيل ....( يعني في نفس السنة اللي أبرهة الشرير كان عايز يهدم الكعبة بالفيل الضخم ... بس ربنا عاقبه و كل الجنود الأشرار اللي كانوا معاه ... و مقدرش يكسر الكعبة ).....

أول لما مامته (آمنة بنت وهب ) ولدته ندهت علي جده ....... أبو باباه .... اسمه عبد المطلب .......شافه ....لقاه طفل شكله جميل أوي ..... فمامة سيدنا محمد قالت لجده ... أنا أما كنت بنام كنت بحلم حلم جميل أوي ...كنت بشوف نور بيخرج من جسمي ... و بينور الدنيا كلها ....

فجده فرح أوي و حس إن الطفل ده هيبقي مش طفل عادي ...و انه لما يكبر هيعلم الدنيا كلها و هيخلي الناس تشوف الحاجات الصح زي النور اللي بيخلينا نشوف كل حاجة في حياتنا .

جده قال .... أنا هسميه محمد !!!! ..... فالناس سألته : يعني إيه محمد ؟؟؟ ....
قالهم يعني ربنا في السماء يحبه و يحب أخلاقه الجميله ... و الناس في الأرض تحبه و تحب أخلاقه الجميلة .

بس سيدنا محمد مش هيفضل مع أهله ،،، وهيسيب مامته وجده ،،،
يا تري مين اللي هياخده ؟

نكمل الحلقة الجاية ،، ☺

........ اللهم صل علي سيدنا محمد .......
و بكره نكمل ....
و قولولي تعليقاتكوا يا أحلي أمهات ...
وهآخدها في اعتباري و أنا بنزل بقيت الأجزاء ....
و دعواتكم

بقلم
الدكتورة رشا رشاد

قصة حنين أم من إصدارات دار الحافظ

قصة زينة واللعبة من إصدارات دار الحافظ

قصة ثوب العيد من اصدارات دار الحافظ